ذاك القَسَم....
نُشِرَت في
اليومين دول عمر أخويا بيوضب المكتبة بتاعت البيت..
النهاردة وأنا داخل البيت لقيته بيقول لي هو أنت اللي حاطط الورقة دي هنا؟
قلت له لا وأخدتها وبأفتحها و ......
ولقيته :
"أقسم بالله العظيم أن أؤدي عملي بالأمانة والشرف، وأن أحافظ على سر المهنة وأحترم قوانينها وتقاليدها، والله على ما أقول شهيد"
قَسَم المهندس
يااااااااااااااااااااه...
الورقة دي أنا كتبهتا أول ما دخلت هندسة بخط ايدي ومضيت تحتها،
وكانت على طول في المحفظة
أو في كشكول من كشاكيل المحاضرات،
وساعات كنت أقف قدام المراية وأقوله..
ولكن قدر الله وما شاء فعل..
كفيني إني أخدت منها روح الهندسة، ويكفيني التعريف اللي طلعت بيه من الكلية لمفهوم الهندسة:
"الهندسة هي علم تطبيق العلوم"
اللي لما أحد معيديني في هندسة سمعه فضل ساكت شوية وبعد كده عجبه أوي..
وبرضه قدر الله وما شاء فعل
وأنا لازلت مصصما عل أنني "أقسم بالله العظيم أن أؤدي عملي بالأمانة والشرف، وأن أحافظ على سر المهنة وأحترم قوانينها وتقاليدها، والله على ما أقول شهيد"
هندسة .. وحشتيني..
وحنيني لأيامك بيزيد
بس في يوم إن شاء الله راجع لك...
إن شاء الله
تعليقات.
تعليقات تاريخية مستوردة من مدوّنة Blogger
عارف افتكرت حالا وانت بتقولي ان اصعب سنة في تجارة اعدادي هندسة
ربنا معاك يا مصعب
مشكلتنا اننا بنتعلم بمبدا "حافظ مش فاهم"، وانت كدا كدا كنت هتسيبها.
ربنا يوفقك يارب وتبر بقسمك وتطبق اللى بتتعلمه.
و لو انى مش فاهمة حاجة
بس حلو اوي تعريفك للهندسة ده ...
بس اول مرة اعرف انك زميل
بالتوفيق يا ابو زمل
فكرتنى بأيام الكلية ربنا ما يعيدها.......
ربنا معاك
ان شاء الله
وربنا يوفقك
فى حاجة لفتت نظرى ان قميص الراجل اللى انتا حاطة فى الصورة مكوى كويس جداً
يااه يا مصعب
تصدق انا كمان وحشتنى الايام دى
و وحشتنى الهندسه
صح هى تطبيق يا فيلسوف
فولا يهمك
و بعدين عاجبك يعنى بهدلتنا
ماكلوا بقى هندزه- صحيح الصوره حلوه اوى و الوانها كمان
القسم في حد ذاته جميل وينفع لأي حاجة
على العموم العلم في الراس مش في الكراس ( على رأي جدتي الله يرحمها)
وانت اكيد اجدع من اي مهندس
هترجعلها ان شاء الله.. أنا واثق.. ده أنت حتى ليك أصحاب كتير.. على الاقل هترجع تشوف اصحابك..
:)
يا عم لأ.. اللي فاتك مش مهم.. اللي مهم اللي قدامك.. والمهم انك ميفوتكش أكتر.. فاهمني يا صاحبي طبعا..
بص يا مصاعصيبو انا اتضايقت قوي لما قريت البوست مش عارفه حسيت بمشاعر مختلفة وانا ما احبش احس بيها معاك انت بالذات يعني مش مهم هندسة طب، تجارة ، علوم المهم انت مصاعيبو اللي كل الناس بتحبه واللي بيبني مستقبله زي ماهو عاوز مش زي اي حد تاني
اااااااااااااا صحيح نسيت اقول لك خطوط الكف عند الرجل ده جامدة موووووت وواضحة يعني عمره طويل وهيتجوز بنت طويلة وقلبه مفتوح ع الدنيا(:
الارجح يا ابو مصعب
انك ساعة القسم مكنتش متوضي
بس متقلقش
اللي يعك في هندسة لابد في يوم يرجعلها
ومين قالك انك دلوقتي مش أحسن يا عم مصعب ؟؟
صدقتي باما مهندسين مدينة نصر
وياما تجار ابرار .
انت يا عم كده احسن كتييير اواوعي تندم على حاجه مكنتش ليك من الاول .
بحبك با مصعب
جرى إيه يا عم مصعب ... انسى كلية هندزة دي خالص لأنك في النهاية الناس برضه وبالعند في عميد الكلية ورئيس النقابة حينادوك برضه (يااااااااا باشمهندز وبعدين الله أعلم ممكن تسكن في يوم م الأيام في المهندسين ... وأديك أهو بتشتغل فيها دلوقتي ... وبعدين عندك أمثلة كتيرة خد عندك خالتك ياسمين أهي دخلت هندسة أول سنة وبالسلامة راحت محولة دوغري على تجارة وعدت معاها الحمد لله وبقت صحفية قد الدنيا وبعدين ربنا كرمها وسافرت على أمريكا أهي ... طب بلاش ياسو ... خد عندك أنا مثلاً ... دخلت علمي رياضة علشان كانت أمنية حياتي أدخل فنون جميلة عمارة أو هندسة قسم عمارة وفي الآخر وطبقاً لقوانين المجموع العقيمة اترميت برضك في أحضان أو تقدر تقول براثن كلية التجارة وبعدين اشتغلت صحفية ... يعني أدي ثلاث حاجات ملهمش أي علاقة ببعض...
على العموم ممكن بعد كده الناس تألف قسم جديد وكل واحد على حسب مهنته يعني ممكن تكتبلك قسم كده زي أقسم بالله أن أحافظ على اللاب توب آرتي وأن أمنع عنه الفيروسات وأغذيه بالبرامج والأفلام الهادفة وألا أشاهد كل ما هو مسف وخارج عليه والله على ما أقول شهيد
إيه رأيك بقى؟؟؟- انت تعرف يا مصعيبو اني انا كمان كنت علمي رياضه و طول عمري اكرة المواد الأدبي و كانت عيبه عندنا اني ادخل ادبي و اخريتها ايه اداب انجليزي يا عم كبر اهو كله محصل بعضه تجارة علي هندسه علي طب المهم الواحد يشتغل سيبك و ئول يا باسط علي العموم انت شيخ البشمهندزين كلهم و لا تزعل يا عم
عارف من فتره كنت بفكر بنفس التفكير
انى حبيت حاجه واضطرتنى الظروف انى ادرس حاجه تانيه ولعبه الاقدار خليتنى اشتغل فى حاجه تالته خالص
بس عارف بجد لو بتحبها اكيد هترجعلها فى يوم
حتى لو مش رجعت فى يوم مش مهم انك تبقى مصعب المهندس او التاجر او الدكتور
المهم حب الناس صدقنى وده اللى اكتشفته مؤخرا حب الناس بجد بالدنيا كلها
كفايه ان كل الناس تحب مصعب بس من غير اى لقب لا قدامه ولا وراه
اول مره ازورك بس اكيد هزورك كتير
تحياتى
بص انا قريت البوست أول مرة .. مكنتش عارف اعلق بصراحة.. فجاتنى غصة في الحلق عندما فكرت ان اقول .. كلية الهندسة خسرت مهندس شاطر واحنا كسبنا مبرمج اشطر..
حسيت انه مهما حاولت اقولك ما تزعلش وانت تقول ان مش زعلان طبقا لمبادئ المجاملة الكونية مش هينفع.. علشان هيفضل في حتة في القلب تهفو للهندسة .. وما حب المؤهلات العليا إلا للكلية الأولى :)
ربنا يحببك في تجارة زي ما حببك في هندسة .. او يرفع من قلبك حب الاتنين- السلام عليكم و رحمة الله و بركاته
ايييييييييييييييييييييييه -دي تنهيده- فكرتني بالذي مضي و الذي لم يأت ...... اللي هو الطب
اما عن ما مضى ...... ما علينا
جميل كده عايزة كده دايما الاقي جدييييييد جديييييييد
سلام
the wall 
فكرتنى بحلم الطفوله انى اكون دكتوره
يالا مبقتش فارقه اعالج بشر ولا نباتات
لاتعليق على دراستنا بقى فى البلد دى
يكغيك يا جارى انك بجد تعرف انت ايه مهما اتغيرت دروبنا
اعرف ان كل شىء بامر الله
انا مش بواسى
تنويه
اقرأ الابليكيشن بتاعى
وبالأخص الشخصيه الثالثه
يا عبقرينو- الستاذ مصعب ..انا محمد عبد اللطيف صاحب البراء .. اتعرفت عليك في حفلة وجيه عزيز ..يا ترى فاكرني ... المهم في الليله دي وبعد مامشينا انا والبراء .. البراء اقنعني ان ليه ما جربش واكتب في مدونة .. المهم تاني يوم انا ب
بدات في مدونة ووكتبت مقدمة ومقال .. اتمنى انك تخش عليها وتقوولي رايك .. بالمناسبة التدوينة الاخيرة حلوة .. اسلوبك في حاجة غربية ..يمكن هي البساطة المفرطة .. هقرا تدوينات تانية وهبعت رايي على الميل
اللينك بنتاع المدونة هو
http://elsaifelhendy.blogspot.com/ 
السلااااام عليكم
والله مش عارفه اقلك ايه بجد
اول مرة اجى المدونة الاقى الموضوع دا
هو فعلا صعب انك تعيش حياتك كلها تتمنى حاجه وتلاقى حاجه تانيه خااالص
مابقتش غريبه الايام دى
مانا اهو مثلا ياما اتمنيت من صغرى حاجات كتير بتتغير كل ماكبر وفى النهاية ايه رسيت على تجارة اللى عمرها مامرت على دماغى ولو لفمتو ثانيه:)))
ياللا قدر الله وماشاء فعل
وتحسبوه شرا وهو خير لكم
وربنا يوفقك على اى حال
بالمناسبه ياريت تنورنا وتشارك بالتصويت فى المسابقه
اسعدنى التعرف على مدونتك وتحياتى ليك
غالبا كل اللي دخلو كلية الهندسة حلموا باحلااااااااااام وردية كتيييييييرة
.
.
زي اللي حلمت بيها طبعا
لكن الواقع اشد قسوة
.
.
تحياتي اليك والسلام
بتفكرني ليه؟؟
انا لحد النهاردة نفسي افترسك
لانك حتي محاولتش تدخلني في المشكلة و تطلب المساعدة
حتي و ان كنت مش بقهم في مجالك لاني عمارة كنت هعرف او علي الاقل هحاول اشوف حد يساعدك في المذاكرة
قدر الله و ما شاء فعل
و لو كان الخير انك تكمل فيها كنت كملت
صراحة اتمني انك تعرف تكملها ازاي معرفش
ينفع؟؟؟- علي فكرة تعريفك للهندسة ده غلط
و لو أحمد شوقش شافه هيديك محاضرة في الأخلاق الحميدة
لانك مذكرتش المصر الي قال ده
ولازم يكون مصدر ذو ثقة - الأخت اللي فوق دي هو مين أحمد قوقاش ده وللا بيعمل ايه علشان تهددي بيه صاحبي كده ده أولا
ثانيا بقى التعريف اللي مصعب بيقوله دخل دماغي موت وعملت سيرش عليه لقيت التالي :
<A HREF="http://www.google.com.eg/search?q=define%3A+engineering&start=0&ie=utf-8&oe=utf-8&client=firefox-a&rls=org.mozilla:en-US:official" REL="nofollow">تعريفات الهندسة على الانترنت</A>
ولقيت أكتر التعريفات دي زي ما مصعب بيقول فما تكسريش مجاديف الواد
مصعب هأقول لك أنا مين أونلاين بس رجاء ما تقولش لحد خالص أنا مين 
وفقك الله لما تحب وترضى- في غصة في حلقي تمنعني من الكلام(مش هما بيقولوها كده)
بجد نظام تعليم فاشل
فاشل فاشل فاشل...من هنا للصبح فاشل
ده شئ انا واثقة منه...واللي حصلك اكبر دليل علي كده
الشئ التاني اللي انا واثقة منه ان هندسة هيا اللي خسرتك
وميهمكش يكفي انك عبقري برمجة ...دي حقيقة لا تقبل الجدل
بشهادة الهندسة او من غير شهادة الهندسة
انت عبقري برمجة
ربنا يرضي عنك ويرضيك ويراضيك
(بالذات الاخيرة دي ..(ويراضيك 
انا كان بيني و بين مسطرة حرف تي قصة حب كبيرة ايام ثانوي
فكرتني بالذي مضى و احلام الشباب
الحمد لله علىكل شئ
انا اول مره ازورك بس ان شاء الله مش تكون الاخريه يعني ديما بأذن الله اكون متابعه
بس اللي لفت نظري هو الحنين حتي لو كان لكلمه للحظه ربما البعض يرها تافهه انك تقف قدام مرايه وتقسم قسم اذا كان هندسه تجاره اي حاجه بتقسم عليها بس المشكله مشكله الحنين ساعات كتيره مش بنقدر نسيطر عليه بس ربنا معاك وتقدر ترجع ليها تاني
مصعب...واحشني يابني بجد والله
انا لسة راجع للبلوج من كام يوم...بالضبط زي ما انت قلت كده...انت اكيد راجعلها طالما واحشاك وانت واحشها وطالما عرفت عنها اللي معرفوش كتير غيرك
اشوفك على خير قريب ان شاء الله
مع اني عند يموقف خاص جدا من هندسة..الا ان بدعيلك ربناا يحقق لك اللي نفسك فيه
